كوني مرا تونسية و نموت على المساواة و الديمقراطية وكوني باش نقلب الفيستا و نولي نهضاوية نطالب بكل جرأة و شفافية بحقي في أربعة رجال اعرسو بيّا... ... راني لاني دشيشة و لا ني شويّة.........................................................................

دعابة مسائية فماش متنحي هالحزن الّي سكن فيّا.....................................

كوني مرا تونسية و نموت على المساواة و الديمقراطية وكوني باش نقلب الفيستا و نولي نهضاوية نطالب بكل جرأة و شفافية بحقي في أربعة رجال اعرسو بيّا... ... راني لاني دشيشة و لا ني شويّة.........................................................................

دعابة مسائية فماش متنحي هالحزن الّي سكن فيّا.....................................

طلّقت القلم...وحرقت الورق...رميت الكتب في واد النسيان...و كتبت بدمعي في بلاصة القلم على خدود منسيّة...كتبت اخر رسالة ماقراها حد... ستيلويا انتحر و اوراقي تنرف في الدّم.................................................................................

يحكيو على قلعة صغيرة اسمها ’’ سنوت’’ , ’’سنوت’’  مرا زعبانة و ياسر مزيانة,لا اهل و لا امالي,لا راجل لا والي...الرّعية عايشة فيها من غير حاكم و لا امير و لا حتى دبّير...فيها كان فنانين احرار      و شاب ثوار...احبو الحياة,يعشقو الالوان,و يعرفوا احققو الاحلام...يعرفو يغنيو,يشطحو و يحكيو... سماوهم زطّالة,منحرفين و ملحدين..نساو هاالناس الي الفنان حسّاس يمن بالرّب و يقرى الكتب...

’’سنوت’’ مرا حنينة لا تعرف لا تجرح لا تبَّكي...تمن بالدنيا,و بالحب...  ’’سنوت’’ اسطورة,  الشعوب الكل تحكي عليها...عملت هالقلعة حوبارة...الناس تحكي عليها من حارة الى حارة...كان يحكمها راجل كبير و مهبول,اسمو ’’مجنون ليلى’’ يموت عالعصا والضرب عاالترمة...ايييييييييييييه قدّاش كسّر خشومات وضرب باشوات من راضية الى بن سدرين و مننساش حمة و كمال...

سيدنا الحاكم شهريار,عندو جواري و برشا صغار,خمرة و سهريات وبرشا حفلات ونساء مشات          و نساء جات........وبعد سنين منسية فدّت الرّعية و ثارت على صاحبنا شهريار...شردّتو هو و الصغار وبقات ’’سنوت’’ المزيانة بلا راجل...مرا هجّالة الطحانة الكل طمعانة فيها...دخلت القلعة بعضها...كثرت السرقة و الخطفة ,الاحتجاج و الارتجاج...اما نتذكر الي فيسع هدات,خاطر’’سنوت’’مرا رزينة,بنت عايلة,متحبش الفضايح...هدات ’’سنوت’’ و بدات اداوي في الجراح...هي هكاكة و ايجيها من بلاد بعيدة اسمها’’يناطيرب’’ راجل شيوبة ساق في الدنيا و ساق في الاخرة اسمو ’’سيدنا الشيخ’’...

رجع متحزم و فرحان بهروب شهريار و قال لاصحاب القلوب الضعيفة ؛ "فنانينكم كفّار و كلامهم يدّي للّنّار و باش ايجيبولكم الاستعمار بحداثتهم و فرانساويتهم...طفّيّوهم و تبعوني نبعدكم على الشيطان     ونبنيلكم في الجنة ديار..." فرحت الرعيّة و قالت ياسعدنا يا هنانا سيدنا الشيخ جانا و باش اشيخنا في الدنا و الاخرة...و تفاهمت الرعيّة باش يعملو نهار يمارسو فيه الديمقراطيّة...صاح سيدنا الشيخ و قال:"كان مانربحش منشعّل في ’’سنوت’’النار(يا رّاها شاعلة فيه)........

وجاء النهار المذكور,الناس قامت وجات من كل البرور,قطعو البحور,الصفوف كانت طويلة اطول من ذيل روبة الاميرة...ديقة ديقة امريكان و المان ويونان الناس الكل تتفرّج فينا...’’سنوت’’يحكيو عليها في الهند و الصين...تحلت البيبان و جاو الضيفان من السبعة الى السبعة (وقداش نكره دين ام رقم سبعة,حياتو كاملة تذير شؤم على ’’سنوت’’) معليناش خنكمّل الحكاية...قام الشعب باش اصوّت,قالولهم فنانين البلاد :"ياناس صوتو للحريّة ,للحب,للإنسانية"

صوّت الشعب و كانو فارحييييييييييييييييييييييييييييييييين وبعد ساعات انتضار ربح سيدنا الشيخ...صحّة ليه ضحكت الدنيا ليه و بكات في وجه ’’سنوت’’,من نهارت الّي ربح والكارثة وراء الاخرة,غرقت البلاد و ماتت العباد,تحرقت القلوب و الوجوه ولاّت رماد,ذبلت ’’سنوت’’ و خليتها على فراش الموت... عبيّت الفليجة وخبيت دموعي في كتابي,ماهنش عليا نشوفك تموت قدامي يامرا,سامحني...ياناس كان عندكم اخبار على هالقلعة قولولي آش صار..................

عندي مدّة تغرمت بالسهرية على موجات الاذاعة الوطنية...ليلي نهار و نهاري ليل.نروّح مهدودة,نرقد و نقوم نصف اليل,نحل الراديو و نسرح شويّة...تي قول نسرح برشا...البلاد دخلا بعضها,برشا مشاكل..بولسيّة و ديوانّية معتصمة في الشمال و الجنوب..طلبة و اساذة معتصمين في منوبة و باردو...الحكاية و مافيها طفلة على نقاب حلّت في البلاد فتارية.حبّيت نقلها صحيت ياصبيّة,تبارك عليك,بالك في بالك بحرقان بلاد وزرعان الفتنة بين العباد باش تربح تسكرةفي الجنّة...رام كذبو عليك كان قلولك ها الكلام ياصبيّة...ياصبيّة فيق..راو ها الرّيق مايواتناش و ماينفعناش,يا صبيّة فيق راو عيب عليك..ياصبيّة راي تونستان خرافة,عمرهاماتوجدت في الخريطة..يا صبيّة قلي شبيك.فهمني شبي اختي؟اش بي بنتي؟يا صبية راك مثقفة,راك  جامعيّة.راك بنت تونس.راك مرا كيفي كيفك.قلي اش عمتلك ياصبيّة؟علاش تحب تكرهني في بلادي؟علاش تحب تحرقلي بلادي؟علاش تحب تقتل الامل و الرحمة في قلب اولادي؟علاش تحب تحل في بلادي فتاريّة؟عذرتك كي طلبت الحريّة.و قلت اش بيه خلّيها تلبس اش تحب.اما قلّي ياصبيّة كي غطيّت وجهك اش حسيّت؟اش زادك؟و وينك قبل؟في عهد علولو,علاش ماثرتش,على نقابك ماغرتش؟خفت من علولو و ماخفتش من ربي؟؟؟؟؟؟فرحانة ياصبيّة؟؟؟؟كي وقّفت جامعات و ضاعت الامتحانات وبركت البلاد و ضيعتلنا سوايع نحو التقدم.اش ربحت ياصبيّة؟؟؟؟حاولت نلقالك اعذار و مبرارت.غاضتني روحي كي ريتك تعيط,تصيح,كي ريت العنف..قلت هذا دينك؟؟قداش مسكينة انت يا صبيّة.و احنا قداش مساكن الّي عطيناك قيمة اكثرمنك..تونس راي اكبر منك و الكمشة الّي احبويدخلو البلاد في ثنيّة مسدودة.ماعندك وين توصل يا طفلة.تنحي والاّ تغطّي.تلبس و الاّ تعرّي.ماعندك ما تبدل.انت مسكينة و انا اكثر منك.

ناس تموت مالفقر,مالمزيرية,مالبرد,مالجوع,مالمرض,و انت تعارك على شوليقة...خممتشي نهار في فريد,راجل عمرو "اش و قفّة",حلموا يعرس,و معندوش باش,ديما يبكي و ايقول إلى     ماما:"يامدام أمنيتي نعرس بهاك الطفلة "عربيّة" اما كيفاش و انا ماعنديش دينار في جيبي".خمّمتشي في طروب الي فنات عمرها تخدم على خواتها. خمّمتشي في خولة الّي تحلم تولّي استاذة,و تخرج مالميزيرية متاع مرت بو بوها,مسكّنتهم في زوز بيوت و كوجينة في اربعين مترو...خممّتشي فيهم ياصبيّة؟؟؟؟؟؟؟؟براو زمرّو نقولها الى برشا ناس عملت مالعراء قضّية,و من الخمار مشكلة وطنيّة...نقلكم رام كذبو عليكم كان فهموكم الّي انتوما على الناس وصيّة و شكون في هالدنيا معصوم من الخطيّة....................................................                                                                    

. نعيب زماننا و العيب فينا, وما لزماننا عيب سوانا.

GITANE : LE 02.12.2011

بعد قداش من سنا رجعنا

ايه يا زمان قداش كبرنا قداش تبدلنا

قداش من بلاد درنا

و قداش من مرا عرفت

و مع قداش من راجل  خرجت

تتفكر كيكانو الناس يحكيو علينا

على عشقنا المجنون وعينينا الحالمة

على مشيتنا على ضحكنا و على خطوتنا

على حبنا

عليك

و عليا

وعلى الزمان الي جمعنا

ايه قداش من ترينو تعدا

وقداش من طيارة مشات و طيارة جات

من المانيا الى تونس

من كلية الطب الى كلية ingéniorat

شتاء تعدا وشتاء فات

وكل شي فات وكل شي مات

شفت وين وصلنا يا ولد الناس

كالغرباء نشربو في كاس تاي في القهوة العالية

بعد سنين حرمان

 سارحين في بلاد الرومان

قطعنا البرور و البحور

حبينا و تحبينا

و حتى شي مامات فينا

نتذكر اول بوسة

اول تعنيقة

اول عركة

اول كلمة نحبك

اول طفلة خنتني معاها

و اول طفل عرفتو بعدك

شفت وين وصلنا ياولد الناس

شفت عينينا

شفت اللمعة الي كانت فيها قداش طفات

شفت اليدين الي كانت ترعش قداش هدات

شفت الفم الي كان يحمار قداش زراق

شفت وين وصلنا ياولد الناس

كل شي مات كل شي فات

شفت وين وصلنا يا ولد الناس

شفت محلانا

شفت مااحلا الموج الغدار الي باع الاسرار

شفت مااحلا احلامنا المنسية

و قلوبنا المكوية

ها درنا ياولد الناس

هانا كبرنا

شخنا و عشنا

تكيفنا و شربنا

عرينا و سترنا

بكينا و فرحنا

وحتى شي ما مات وحتى شي ما فات

شفت وين وصلنا يا ولد الناس 

GITANE

Tunis le27 .10.2011 à 20H20

Pour Louis ARAGON…

دموع مزغللة و قلب محروق

وطفلة ضايعة بين غروب و شروق

ايجا متخافش

ايجا هزها وطبروا

 وراء سحاب

وراء سماء

وراء شمس

وراء قمر

اهربوا لبلاد ظلام

وكونوا فيها النور

خاطر هالبلاد جرحوها الي كرهوها

ياخي قسات علي حبوها

انت ماكش مجنون و انا ما نيش هند

عمري ما كنت جوليات و لا ليلى

انا مرا

انا انتي

وانتي انا

انا مرا

انا مرا في بلاد ضايعة فيها النساء

في بلاد انقرضت منها النساء

في بلاد فيها نساء تضلمت

نساء تضربت و ضربت

في بلاد فيها كان للات النساء

باش اهج

باش يهرب منك

و اخليني لدموع مالدم

وحمير فحم

وشعر مالردم

باش اهج

باش يمشي يغني للمطر انشودتها

مع مرا

مع جوليات

مع جميلة

لكلو منك ياتونس

رديتني وحش بنياب

زرعت فيا الشك والعذاب

ونهايتي نبقى كيما سور في كنيسة حزينة

 نسمع في صوت العشاق و ضحك البنات

مع موزيكة الجنون الفرحانة

تشطح على نغمات صوت عشقتي الحزين

علاش يا تونس

علاش ياتونس رمتني في النار وهزتلي شهريار

وسلمتني لحضن الموج الغدار

هكة هونت عليك ياتونس

ياخي قلي حرام نحب

عيب نتحب

علاش لا رحمتني و لا خليت رحمة الرب

علاش كتبتلي نعيش شهرزاد حزينة

حرام نحب و الا عيب نتحب

GITANE …

تونس في تاريخ غير معلوم

Pour Jorg MOONEN.